Hirmaannaa Dubartoota Oromiyaa Hoggansa Maatii, Sabaafi Ispoortii Keessatti--G fi D Aadde Xahaayi Wadajoo Waliin

Aadde Xahaayi Wadaajoo, Hundeessituufi Qajeelchituu Olaantuun  jaarmiyaa namoomaa durbootaafi dubartoota gargaaru kan gabaajee REAL jedhamuun waamamu, "Waa'een dubartootaa, waa'ee saba hundaati, " jetti. Gaaffiif deebiin kun hirmaannaa dubartoonnifi durboonni Oromoo ijaarsafi hoggansa dhaabota hawaasaa, namoomaafi siyaasaa keessatti qabanirratti xiyyeeffata. Akka kanaan, maloonni/tooftaleen dubartoonni itti ijaaramuufi aanga'uu (umnoomuu)fi  danda'anis gadifageenyaan G fi D kana keessatti xiinxalame. Aadaan keenya dubartoota laalchisee waantoota gaggaarii maalfaa qaba? Hamaa oo?  Shaakaloota aadaa kanneen dubartoota cunqursan  bira taruun akkamitti otoo dhiraafi dubartii wal hinwaraanin furmaanni nagaa jara lachuufuu ta'u argamuu danda'a? Kanneenirratti deebii argachuuf sagantaa kana jalqabaa hanga dhumaatti gatii otoo hinbaasin akka dhaggeeffattan sin afeerra. Hiriyootaafi firoota kessanifis sabaahimaalee hawaasa akka Facebook, Twitter kkf irrati akka qooddan sin gaafanna. Akkasumas, yaadota dubartootafi durbootarratti qabdan marsaadhuma kanarrattis akka laattan isin jajjabeessina.  Dhuma sagantaa kanarattis geerarsa weellistuu Oromoo Angaatuu argattu. Eyyen, dubartiinis nigeerrarti!